輸入法

我爸爸呢排放假,他在家學習倉頡輸入法.我都覺得佢幾好野.

睇緊呢篇野的人實會覺得有乜咁出奇.我自己本身唔太明倉頡的拆字方式,覺得好戇9,居然要睇番符號打字,不合邏輯.但偏偏世事就係咁,你越覺得不可能的野永遠都發生了.我自己就用廣東話輸入法.這是一種不普遍的輸入法,但容易明白快上手,只要你懂廣東話便可.

我爸爸話倉頡有d字拆法幾怪,我認同,這是我不學倉頡的原因之一.主要原因是我覺得寄代碼很煩,也多,我那小腦容不下那麼多的東西.

終於放假了

終於放假了,
考晒試了
我又可以好好地睡一大覺
與A台為伴了.

我的紀錄:一訓訓14小時,你呢?

痴線的元朗公路

今日放學得閒,上左部261向上水出發,去感受下佢d路係點.

嘩,都未上公路,係藍地交匯處就已經收窄d路,上左去頭果1km路質都可以,不過線位亂,左轉右轉,之後一過深港西部通道個條橋就黎啦,上下左右狂fing ,我試過映相,不過好矇.沿路有好多路牌等待安裝,亦都有d電子信息顯示屏已安裝妥當,但寫上測試中.有d 路牌我估係工程公司自制,擺錯位成日出現.吾夠500m的就放500m;或者倒轉,多過500m的又放500m,指示非常混亂.需要留心的是 EXIT14 & EXIT15,呢兩個出口中間果段路簡直係精華所在

我一路坐一路覺得司機好野,我自問若果對住d咁既路我神早炒車,但睇佢地渣得好應付自如,我要寫個服字.

過左博愛交匯處之後都無野鬧,新田公路都係對面線撞車先有塞車(對面線only).沿途極暢順.

今日收穫都幾好.

藍輸硬?綠嬴硬?

2005/12/3是台灣的縣市長選舉日.這一場選舉被視為2008總統選舉的熱身.今年綠被高捷搞到一身蟻,阿扁同蘇貞昌能否靠唱兩句<愛拼才會嬴>就輸少d?對家藍營又係咪可以洗脫黑金政治,真的經營一個清廉的台灣呢?

各大台灣傳媒都用大篇幅報道,反觀香港,不論報紙和電視都沒有很深入的報道.可能焦點放在九江地震和太空人訪港吧.若我是主編,就會放多一點資源在台灣選舉上,這總好過睇太空人日日夜夜揮手吧!

快車回來了

今天,我又去遊車河了.先上102過海到北角.架車今日就似樣了.有位就比油,左抽右攝,很快便過到海.美中不足是比BREAK比得太勁,我睡著都比佢chok醒.

跟住上左架41A去香港仔.我貪佢行山路,D車又快,路又窄,最岩邊睇邊記車長如何入灣出灣避車,正!不過車長係南風道唔肯去,70都無,比較慢.返到落黃竹坑道就飛到過晒70,正!

最後坐香港仔->旺角紅色小巴.架車好靚,司機有心機渣,但成日比車阻,全程最高得83,太慢了!因為我expect佢有100或以上.

今天的遊車河似乎比早幾日好好多了

新書發布會

昨天我去了一個"作家"的新書發布會.老實說,阿"作家"講野其實都唔係話好精彩,但佢請d嘉賓講野就真係好精彩,全場拍爛手掌.阿"作家"個發布會中途有個遊戲, 結果兩位嘉賓一致認為我贏,獎品就是阿"作家"的"特別簽名版"新書一本.

阿"作家"真人同上鏡一樣咁靚.行文至此,大家估到果位"作家"是誰嗎?佢就係..........無錯,就係佢啦.

生日=坐慢車?

今天生日,諗住有好運,坐快車,點知:
1)坐67m返學,沿途被10架巴士爬頭,車速不超過60km/h,去到何福堂比後車GD568爬,落車果陣仲見到三車GF5012係我架車後面,好很嬲,即刻port人.
2)放學貪過癮坐44小巴去上水,最高只得106km/h,太慢了,我expect佢最少110km/h,
架車經過擴闊中的元朗公路,條路算平坦,不過d路牌指示幾混亂,有一個係寫"洪水橋,天水圍 1000m, Exit 15"黐埋一齊,好難睇.不過呢個並非本文重點,遲d開新文講.
3)搭部102.部車由祝生駕駛.阿祝生依然故我地碌車,不過佢今日無出盡十成功力,我有小小失望.一落車,原來已有兩部九巴102跟到.但我出奇地又唔覺得火,可能是哀莫大於心死吧.
4)最後搭30x歸家.又見到一位碌車的人了.佢在頭幾個站都算渣得快(佢的標準來說).但一上高速就原形畢露了,哈哈.一落車,原來後車跟到了.
飲得杯落呀,Yeah!

原來生日的搭車可以是這樣的

轉貼 : 笑罵電子傳媒﹝超級加長版﹞

Plese visit the following site :
http://www.inmediahk.net/public/article?item_id=79601&group_id=31

我個人覺得 very good,大家睇下啦

大尾篤水壩遊記

我今天同家人去左大尾篤水壩行左個圈.我們搭火車在大埔墟下車,轉20c,架小巴我嫌慢,汀角路最高只有72.

今天人不多,但空氣不算好,望向對岸的馬鞍山也不清楚.我在水壩面(條單車徑)走了一圈,共13.2km,又熱又晒,累得要命.因為今天早上我又游了一小時水.

回程時,我和家人仍選小巴,主因是可以有得揀位坐.呢架出返去同入黎果架唔同,平均速度高一點,但他最快只有73.不過在臨入火車站果段路就勁飛,差不多有70.

今天的旅途尚算可以啦.不過好熱,好累.我亦有點不明白,為何大埔區咁多紅綠燈.我無算過小巴沿途經過了多少燈位,但架車成日行行停停行行停停,轉上四波未夠十秒又收油,成日2,3波拖來拖去,大埔的道路設計真是.............

台灣傳媒的又一次恐慌(修改+補充)

TVBS踢爆陳敏賢和陳哲男在賭場裏共聚此舉為台灣帶來很大的衝擊。令人非常關注的是，台灣新聞局長姚文智語出驚人，說要收回TVBS的牌照.國民黨團派說:若新聞局收回TVBS 牌照則會號召民眾上街。而令到事情越鬧越大的TVBS節目《2100全民開講》的收視就一路開高。

這件事我想阿扁政府有排煩了。阿扁在這時候說要以TVBS違反外資股權來懲處，時機不當。TVBS的股份安排不符台灣法例已經不是今天的事，為何不早早判罰，而到現在才行動？還有，姚文智應該要收口了。他的言論非常惹火，不計今次TVBS的事,今年他已為台灣社會政壇帶來很多風雨.

若不把政治成份看在內， 我們則很清楚這是100%的打壓新聞自由的行為。試想，一個高壓獨裁政府才會粗暴干預新聞自由，但台灣是一個民主的社會，但這種干預新聞自由的程度竟回到十多年前未開放的時候，真令人難過。

作為一個經常看台灣時事政治新聞的人,我覺得阿扁現在做的和對岸共黨真的無分別,對岸情況如何不用多說,滿以為隔了個海會好一點,但,仍是一樣.今年八月,新聞局才對電視媒體進行了整頓,引發了一輪風波.不夠兩月,又來一次,這次還要是因為媒體在做他們應做的事而被整治.我想民進黨政府都好危下.衷心祝願TVBS能夠渡過這次政治風暴吧!

<<青春舞曲2000>>

今晚心血來潮,找舊歌聽,聽返呢隻歌,有好大感觸:
<<青春舞曲2000>>
唱：合唱 詞：林夕　曲：羅大佑
_________________________

香港如何飄香　鄉里歡聚異鄉
東與西聯營開張　新市民舊土壤
家國應如何稱呼　黑眼睛黃皮膚
一畝梯田 容萬千住戶　關帝遙望天父

怎麼城市需要青春不老的仙藥
高速的游戲令人老化但仍舊活著
怎麼高樓似一片樹林建在荒山上
因這裏風聲風向風霜變幻無常
拋開銅鐵刀劍為何以銀彈較量
不管叫躍進衝刺升級總要分強弱
千千種路線主義是誰最大方漂亮
只須有金光普照不管太陽或月亮

不同心　同用良心思想
為何高聲各自叫嚷卻不能再原諒
不同聲　來自同一家鄉
為同一心 願同樣不自覺地流淚或拍掌

怎麼城市需要文明去換不老藥
只因美夢要堆砌軀體都要生存著
怎麼高樓似一片樹林建在荒山上
因這裏風聲風向風霜變幻無常
拋開銅鐵刀劍為何以銀彈較量
不管叫躍進衝刺升級總要分強弱
千千種路線主義是誰最大方漂亮
只須有金光普照不管太陽或月亮

不同心　同用良心思想
為何高聲各自叫嚷 卻不能再原諒
不同聲　來自同一家鄉
為同一心　願同樣不自覺地流淚或拍掌

太陽下山 明朝依舊爬上來
花兒謝了 明年還是一樣的開
我的青春一去無影蹤
我的青春小鳥一去不回來
我的青春小鳥一去不回來
別的那樣呦　別的那樣呦
我的青春小鳥一去不回來

荊花謝了菊花照舊年年開
西風弱了東風繼續時時來
繁盛文明是否以後尚在
黑錢白眼金咭赤字何時更改
青春綠印碧海鐵幕何時回來

別的那樣呦　別的那樣呦
但我只得膚色染盡萬萬年代

香港如何飄香　鄉里歡聚異鄉
東與西聯營開張　新角色舊土壤
家國應如何稱呼　黑眼睛黃皮膚
一畝梯田容萬千住戶　關帝遙望天父
家國應如何稱呼　黑眼睛黃皮膚
一畝梯田容萬千住戶　關帝遙望天父
一畝梯田容萬千住戶　關帝遙望天父
關帝遙望天父
關帝遙望天父
____________________________
聽完之後,令人不得不佩服林夕之手筆,寫下如斯到肉的歌詞.識得呢首歌的朋友年紀應該都唔細了.你還懷偭往昔嗎?

報紙又減價

太陽報減價,賣3蚊一份.你問我點睇?我只能祝各太陽員工好運.

免費報紙而家有3份,頭條的風格和讀者群都係睇開東方太陽蘋果果群人.蘋果率先改版,改番一向做得較弱的外電新聞,再加上外國娛樂,咁就整左個新版面-蘋果世界出來了.從成效來看,蘋果這次的行動算是成功,最少減低了免費報紙的衝擊.據個別報販表示,蘋果算係跌紙跌得最少的一份.至於東方和太陽,佢就笑而不答.

回想起早幾年減價戰的時候,我可以在下午3時於個別地區用1元買到一份太陽.彷佛又回到從前............

三個project

三個project一齊殺埋身,很要命啊!

一日到黑都剩係對住個mon,眼都突埋,不停留眼水,又要邊諗邊打, 真係命都短幾年

屯門村巴

今日都未諗到講乜時事議題,講下其他野先.

我禮拜四晚1830係嶺南門口個巴士站上左架24座村巴去旺角.佢只收十元正,比67x 平七毫.沿途大致跟67x行法,不過佢會改入屯門市廣場同柏麗中間果個巴士站搶58x客,成架車會好快上滿的.

一上公路,架車keep住行80,最高105,大約20分鐘就到荔枝角地鐵站.佢會繼續沿長沙灣道和彌敦道行,跟住轉入旺角道,終點站是西洋菜南街(旺角地鐵站快富街a出口). 由旺角到嶺南,可以用少過35分鐘.

據負責人講,舊年佢地原先係1900才由嶺南開車的,不過今年有嶺南人同佢地呻,先至提早到1830開車.各位在屯門返工返學的人,你地晚上出市區又多個選擇喇!

香港迪士尼試玩後記

香港迪士尼試玩後記

香港迪士尼真係好細啊,先係個地鐵站,日頭睇就好肉酸同暗,夜晚睇就幾有feel.佢架迪士尼線列車係整得幾靚,不過d訊號系統做得差,架車成日加速減速,chok來chok去,記得捉實扶手呀.

另外一樣就係要排.相信大家都知道如何排法,不贅.

但係我想講,迪士尼d工作人員服務態度並非傳媒寫得咁差,最少我覺得那天如是.依我所見,他們樂意為客人解答問題,不像傳媒寫佢地d員工面黑黑對人.

加價

小巴加價,貨櫃運費加價,皆因石油加價.你問我的看法,我會用我修練數十年的精神分列大法去寫.

贊成:油價上升,司機人工升,隧道費加,保險費升,乘客量不穩定,慳到無可再慳.......

反對:乘客人工無加,加幅驚人,無理由成日拎乘客開刀,你班小巴佬又無提高到服務質素,仲學人加價,搞錯呀.........

結論:得個嘈字.

我的看法:
早在今年初,已有紅色小巴率先加價,不過只涉及數條路線,又無傳媒收到風,所以先無人理.有人提議話收燃油附加費,好似飛機一樣.我的看法是:第一,你可以收,但油價回落之後就唔好扮懵唔減價.第二,最多只加五毫,不論紅色綠色長程短程.否則一定反對.

Google Talk試用

私人文章一篇,時事評論遲D繼續

早幾日DOWNLOAD Google Talk試玩,
又覺得呢舊野幾過癮.
暫時未發掘到這舊野的所有功能,
最少我就找不到好似MSN可以SEND附加檔案

這舊野最衰一定要有Gmail Account先有得玩,
但佢行起來比MSN更好,無咁食RAM.

下載網址在此: www.google.com/talk/

兩邊都要鬧

周一嶽,你條仆街正係成日叫班魚販欄商不要意氣用事,你自己又做左乜野出黎可以比人鬧少陣?上京同呀爺做戲咁就算喇? 香港市民並非你想像中的無知和愚蠢,唔好係度侮辱民智啦唔該!
請你下台!

魚販和欄商,你地咁柒叻就應該一早罷市啦!頭先話罷市而家又唔罷,即係點呀?淆底呀?

我地食乜好?

魚-孔雀石綠
豬-豬鏈球菌

還有眾多食肆的集體食物中毒個案,出街食同係屋企食原來一樣,咁我地係咪應該只係飲水好呢?

有線 A台

繼續講私人野

昨天管理處貼上通告,徵求住戶對安裝有線的意見.通告內容大致話,每戶每月比$1.3就可以了.
我就當然第一時間簽名支持啦!

衷心希望有有線睇!

0.99

繼續講私人野

早兩日買多兩條256MB RAM,因為部機開始慢了.與此同時,我要儲錢去UPGRADE CPU,費事部機行得咁慢嘛.

UPGRADE完之後,我部機而家可用的RAM數是0.99GB

Peter Jennnings

Peter Jennings因肺癌逝世,ABC為他製作了一個特輯,看後真的感概良多.

讓我慢慢說.首先,他不怕被質疑資歷不足,自願在主播台退下來,走到各國採訪,增廣見聞.在別人來看,這會被視為降職.但 Peter沒有理會這些職銜上的爭拗,仍一心一意到世界各地的採訪.他這種不特別追求名利的心態非常令人敬佩.

第二,他能夠完全擁有編輯自主的能力,播報觀眾想知的事.需知道很多電視台的"主播"根本沒有編輯能力,有如一副人肉讀槁機器.如果有甚麼突發新聞,他們便會驚惶失措,呆在鏡頭前.

單是上述兩點已足夠本地新聞同業好好學習及反思.文章最後,讓我們再一次懷念 Peter Jennings

天災人禍

今日日本先有7.2級地震,據報有數十人受傷,無人死亡真係好彩.其實最好彩係今次地震所引發的海嘯只屬輕微,無來多一次南亞大海嘯.

接著,這個星期內先後有兩架飛機墜毀,無人生還.一個就引擎故障,一個就空氣調節故障.這是巧合還是人禍?

HKCEE

考試局年年都搞到一鑊粥咁,
我要比錢你先有試考,
但係就比D咁ge SERVICE,
比著你係個客,你會唔會滿意呀?
嗌回水都黎唔切啦.
果個考評局主席D道歉咁無誠意,
仲有李國章的態度係比人鬧下先安樂.
實際點, 兩個都下台吧!

無眼睇的無線新聞

本文不談時事,只會風花說月.

報載無線新聞又有一輪逃忘潮.幕前已知有徐蕙儀;幕後有許友明,梁宙然和何孟志.依目前的情況看,應該仲會有更多人走,不論幕前幕後.

有人會問:一間公司有人事變動有乜咁奇,又唔關你事,做乜要開文講?

答案是:自從六嬸打骰後,無線新聞的確差了很多,走了很多打得又睇得的記者.講人氣高的有李燦榮,魏綺珊和趙麗如;新紮師妹型的陳嘉怡和王春媚;經驗豐富的莫宜端;更加唔好講羅燦,謝彩雲,張志剛三兄妹一齊起身.

有人或者不同意我的講法.在六嬸打骰,袁老花和爛口共同主政的年代,捧紅了一班美女主播和用低薪請一班新人慢慢train,在電視台來說不是更好嗎?

問題是:做新聞的要素除了夠新,夠快,題材符合觀眾的要求外,質素重唔重要?

今天的無線新聞相比以前真是差得遠矣.唔好講話同十幾年前比較,淨係同返幾年前比較都已經差好遠.新聞角度唔夠多同闊;同行個個有的故事可以走漏,即使企圖follow up,都只係講D觀眾晨早就知ge野.編輯成日搞錯同埋無double-check資料,外電成日亂譯一通.如果要講,三日都講唔晒.

為何無線新聞會弄成今日之田地?昔日TVB NEWS的光輝歲月是否只可緬懷?無線有否想下辦法保住你個招牌費事比人拆 ?定只係甘於做宣傳機器?

發現號

發現號最終都能返回地球.詳情我就不多說了,因為電視,電台,報紙都有講,甚至有網上直播,所以不提.

今次發現號事件令人覺得太空總署都幾不顧人身安全.開頭未飛已經有故障,起飛果下又有碎片脫落,上到太空又要人手整走瓦片.能夠安全回航真係大話夾好彩.

我個人希望太空總署做好D安全措施先,跟住先好開發新一代穿梭機.

和中學舊同學渡過的一個黃昏

今天唔評論時事住,講下私人野先

今晚同個舊同學慶祝生日(其實補祝才對),一班人走了去扒王之王吃晚餐.席間,大家講左好多野.例如,我以前間中學進行了一場大型人事鬥爭,有人比人逼走,有人戀棧權力,也有好多人在風暴來臨前告老歸田.最令人意外就是D先生們亂搞男女關係,婚外情同未婚產子都有.看見這間學校淪落至此,真的感到晞噓和羞愧,出到去都費事認係佢地D舊生.

回說間扒王,野食可以,但服務認真麻麻.又唔係無大檯,叫5個人坐4人檯,真好野.跟住又做埋D滾水祿腳ge小動作想叫人走,真好野.

跟住去左打機,有兩隻game幾好玩.一隻類近常識問答,另一隻講配對食物.常識問答果隻D題目唔算深,有D係幾易答.配對食物果隻就考反應.玩完配對食物果隻之後,爭D聲都開唔到.好在之後有人帶去食糖水.

我就食左碗楊枝甘露.味道不錯,用料都幾足.我另外一個舊同學同埋佢細佬都係度做兼職,所以招呼非常好.大家成班人都笑得好厲害,將近失控.

這個黃昏過得非常好,弊在成日落雨.
這是今天日記的終點站,多謝瀏覽.
明天繼續談論時事.

台灣傳媒的觀感(1)

台灣傳媒給我的觀感是資訊太多,過度爆棚.我不太熟悉的節目類型就不多說了,今次首先說電視新聞報道.

看我這個blog的唔知有幾多人是每天都看台灣電視新聞的呢?現在看台灣電視新聞是很方便的,上網就可以睇東森,中天(mms方式),如果想就咁開電視就有得睇:一至五晚亞視英文台,無線的英文台更是每天凌晨五時播送.如果你是裝有Now BB/HKBN/SunTV的話,更有ETTV-ASIA / TVBS-NEWS 24小時隨你睇.

先讓我們數較大而又有製作新聞報道的電視台.上面已經寫左三間:東森,中天,TVBS . 仲有三立,非凡,年代,台視,民視,華視.那當然還有其他的台啦,不過太多,記唔晒.

台灣人口只有二千三百多萬,但卻擁有九大個電視台,而每個台下面仲有各色各樣的頻道(channel),競爭激烈程度可想而知.收視率,廣告與營業額環環相扣是一個定律.故此,大家都拼命搶收視,於是造成了今天的現象.

台灣電視新聞第一樣與傳統新聞不同的手法是"新聞娛樂化"."新聞娛樂化"的現象未必最先在台灣發生,但台灣肯定是其中一個"發揚光大"的地方.隨便舉個例,林志玲墮馬受傷的新聞放在新聞頭條,各大傳媒並花大篇幅報道.這件事在本港的新聞裏被歸類為娛樂新聞 .同時期的香港傳媒則在聚焦於西鐵頻密的故障和四川的豬鏈球菌.雖則香港傳媒也有大篇林志玲的報道,但他們會透過娛樂節目報道,而不是新聞報道.這可反映兩地傳媒的文化差異.

第二是很喜歡跟進觀眾一些雞毛蒜皮的投訴,然後就做一些所謂獨家報道.舉例說, 有位婦人的BENZ被人在一個月內偷去睹後鏡三次也可成為新聞,這種報道只能讓人覺得無聊.其他地方我不知就不說.但在本港,這類型的事情根本不可能成為新聞.

台灣傳媒的觀感寫住咁多先,諗到繼續寫

環保組織

就今晚新聞,果班仆街環保組織又抽樣進行巴士冷氣調查.結果不用多說了,當然又話架車D冷氣太凍,應該要調至25.5度先可以.

你班環保組織知唔知道巴士公司已經幫佢地d車重新調較冷氣,兼且重要較細左好多?你地怕凍但一樣有人怕熱,有否顧及別人感受?你地咁柒叻不如放火燒晒所有冷氣車好唔好?實減少廢氣啦下嘩?

想成功說服別人必先以身作則.從今天起,請各偉大的環保組織拆去你們辦公室內所有空調,開窗呼吸.如果你們能夠長久執行這政策則當然可繼續暢所欲言.如果你們不能執行這政策一年或以上,煩請收皮.

台灣傳媒&泥石流

(修正版)

今年係有好多風吹去台灣，個個都唔係野小.先有海棠,後有麥沙(台灣叫馬莎,我叫佢麥提沙).水浸落大雨斷水斷電橋樑道路塌方泥石流.......見得多,見怪不怪.

但最奇怪係年年一定有,同對岸成日話的百年一遇一模一樣.阿扁有無認真研究如何搞掂泥石流?次次都搞到有班人受囷,又比D電視新聞大做特做.

遲d有時間先講下我對台灣傳媒的觀感.

觀看這個blog的注意事項

1)一定有粗口，中英文雙語廣播
2)不定時更新
3)沒有固定話題，我想講乜就講乜
4)如果你要發表意見，請留下你的名字，你的e-mail/blog留晤留就真係無所謂

多謝合作!

welcome

welcome to my blog!

I will post my words later.
bookmark and stay tune!